پاکستان شدت پسندوں کے ہاتھوں یرغمال نہیں بننے دیں گے

 فرقہ واریت قومی سلامتی اور امن کیلئے تباہی کا باعث ہے، علامہ عبدالخالق اسدی
لاہور(نیوز ڈیسک) پاکستان کسی مسلک کی جاگیر نہیں، اسے شدت پسندوں کے ہاتھوں یرغمال نہیں بننے دیں گے۔ فرقہ واریت قومی سلامتی اور ملک کے امن کیلئے تباہی کا باعث ہے، اس کی کسی بھی صورت تائید نہیں کی جا سکتی ، ان خیالات کا اظہارمجلس وحدت مسلمین پنجاب کے صوبائی سیکرٹری جنرل علامہ عبدالخالق اسدی نے لاہور میں عہدیداروں سے خطاب کرتے ہوئے کیا، انہوں نے کہا کہ فرقہ واریت کی آڑ میں ملت تشیع کو نشانہ بنانے پر ہم خاموش نہیں بیٹھیں گے انہوں نے کہا کہ شیعہ سنی مکاتب فکر کے عقائد میں اختلاف آج کے نہیں ، چودہ سو سالوں سے ہیں، جو عناصر ان اختلافات کو ہوا دے کر تصادم میں بدلنا چاہتے ہیں، ان کی ڈوری کہیں اور سے ہل رہی ہے، ہماری تمام حالات پر گہری نظر ہے ،علامہ اسدی نے کہا سوشل میڈیا پر ملت تشیع، عزاداری اور علما و ذاکرین کیخلاف مسلسل اشتعال انگیز پروپیگنڈہ کیا جا رہا ہے، ملک میں انارکی کا اصل سبب یہ تکفیری گروپ ہے، جو فرضی ناموں سے مسلمانوں کے درمیان نفرت کے بیج بو رہا ہے، ایسے لوگوں پر جب تک آہنی ہاتھ نہیں ڈالا جاتا، تب تک یہ جلتی پر تیل کا کام جاری رکھیں گے