Ilyas 
امریکا پاکستان تعلقات نہ صرف علاقائی تعلقات اور تنازعات کے حل کیلئے اہم ہیں بلکہ دونوں ممالک کے مفاد اور خطے میں استحکام کے لیے بھی ضروری ہیں
تعلقات سے امریکا خطے میں جنگ کے خطرات ٹالنے، دہشت گردی پرکنٹرول ، خطے میں استحکام کو یقینی بنانے کے اہم اہداف بھی حاصل کر سکتا ہے،رپورٹ
واشنگٹن(نیوز ڈیسک) امریکا اور پاکستان کے تعاون پر مبنی تعلقات نہ صرف علاقائی تعلقات اور تنازعات کے حل کے حوالوں سے اہمیت کے حامل ہیں بلکہ دونوں ممالک کے مفاد اور خطے میں استحکام کے لیے بھی ضروری ہیں ،یہ دعویٰ پاک امریکا تعلقات سے متعلق تازہ ترین تحقیقی رپورٹ پاکستان امریکا تعلقات میں ایک نئے دور کاآغازمیں کیا گیا، رپورٹ کے مطابق طویل عرصے سے جاری مسائل اور حالیہ چیلنجز کے باوجود دونوں ممالک کے باہمی تعلقات کو کئی شعبوں میں مضبوط بنیادوں پر استوار کیا جاسکتا ہے اور ایسا کرنا دونوں ممالک اور خطے کے لیے مفید ہو گا، رپورٹ میں کہا گیا ہے کہ ضرورت اس بات کی ہے کہ امریکا اور پاکستان دونوں ممالک کے اہداف کو سامنے رکھتے ہوئے ایک فریم ورک کے تحت وسیع البنیاد اور طویل المیعاد تعلقات قائم کریں، امریکا اور پاکستان کے ٹھوس بنیادوں پر تعلقات نہ صرف پاکستان کو درپیش مسائل کے حل میں مدد گار ثابت ہوں گے بلکہ ان سے امریکا خطے میں جنگ کے خطرے کو ٹالنے، دہشت گردی پر قابو پانے، خطے میں استحکام کو یقینی بنانے کے اہم اہداف بھی حاصل کر سکتا ہے اور یوں واشنگٹن اس اہم خطے کے عظیم اقتصادی مواقع سے بھرپور استفادہ بھی کر سکتا ہے،رپورٹ میں تعلقات کو مثبت سمت میں استوار کرنے کیلئے 7 مقاصد کی نشاندہی کی ہے،جس میں واشنگٹن اور اسلام آباد کے باہمی تعلقات کو جغرافیائی سیاست سے، جغرافیائی اقتصادی تعاون کی طرف لے جانا، پاکستان میں انسانی ترقی کو سرمایہ کاری کے ذریعہ بہتر بنانا، افغانستان کے لیے مل کر کام کرنا، دہشت گردی کا مل کر مقابلہ کرنا، امریکا اور چین میں مقابلے کو تعاون کی طرف لے جانا، امریکا اور بھارت کے تعلقات سے اس کے اثرات کے حوالے سے نمٹنا، اور قدرتی آفات اورآب و ہوا میں تبدیلی کے معاملات پر تعاون کرنا شامل ہیں اس تحقیق میں ان تمام شعبوں میں تعاون کے فوائد اور عدم تعاون کے نقصانات پر بھی روشنی ڈالی گئی ہے۔
