وزیر خارجہ شاہ محمود قریشی کا کہنا ہے کہ بھارتی جیلوں میں حریت رہنماؤں کو انصاف کی امید نہیں، بھارت نے حریت رہنماؤں کو حبس بے جا میں رکھا ہے، آج دنیا کشمیر کے معاملے پر پاکستان کی آواز بن رہی ہے۔ اسلام آباد میں میڈیا سے گفتگو کرتے ہوئے وزیر خارجہ نے کہا کہ کشمیر پر آواز اٹھانے والے برطانوی ارکان کو خراج تحسین پیش کرتا ہوں، 10 برطانوی اراکین پارلیمنٹ نے کہا کہ بھارتی افواج نے کشمیریوں کے بنیادی حقوق سلب کر رکھے ہیں۔
وزیر خارجہ کا کہنا تھا کہ یہ پاکستان کی سفارتی کامیابی ہے۔ شاہ محمود قریشی کا کہنا تھا کہ آج دنیا کشمیر کے مسئلے پر ہمارے موقف سے اتفاق کررہی ہے، مسئلہ کشمیر عرصہ دراز سے سلامتی کونسل کے ایجنڈے پر ہے، مسئلہ کشمیر عالمی سطح پر تسلیم شدہ متنازع مسئلہ ہے، ہم شروع سے کہتے آرہے بھارت دنیا کو غلط تاثر دینے کی کوشش کر رہا ہے۔
