تحفظِ بنیادِ اسلام بل ، تحفظِ خارجیت بل قرار ، علمائے اہلسنت

علما اہلِ سنت کی تشویش کے پیشِ نظر گورنر پنجاب بل پر دستخط نہ کریں
لاہور(نیوز ڈیسک) اہل تشیع کے بعد اہل سنت بھی پنجاب اسمبلی سے پاس ہونیوالے متنازع تحفظ بنیاد اسلام بل کیخلاف میدان میں آ گئے، مرکزی علمائے اہلسنت پاکستان کے رہنماوں نے لاہور میں پریس کانفرنس کے دوران تحفظِ بنیادِ دین اسلام بل کو تحفظِ خارجیت بل قرار دے دیا، مرکزی علمائے اہلسنت پاکستان کے رہنما ڈاکٹر علامہ شبیر انجم اور دیگر نے کہا کہ اگر بل ایکٹ بن جاتا ہے تو ہم پھر کوئی دینی بات ضابطہ تحریر میں نہیں لا سکتے، یہ بل اہل سنت کی نسلوں کو تبدیل کرنے کی سازش ہے۔ جسے مسترد کرتے ہیں رہنماوں کا کہنا تھا کہ سب کو معلوم ہے کہ ہم اذان سے قبل آلِ محمدؑ پر بھی درود و سلام پیش کرتے ہیں اور صحابہ کرامؓ پر بھی سلام پیش کرتے ہیں، انہوں نے کہا کہ ہمارا حکومت سے مطالبہ ہے کہ فورا اس بل کو واپس لیا جائے اور علما اہلِ سنت کی تشویش کے پیشِ نظر گورنر پنجاب چودھری محمد سرور اس بل پر دستخط نہ کریں