بی بی فاطمہ زہراؑ کائنات کی خواتین کے لئے رول ماڈل ہیں، فائزہ نقوی

اہل بیت ؑکو قرآن مجید میں طہارت و پاکیزگی سے مزین قراردیا گیا،مرکزی صدر جے یو پی شعبہ خواتین
لاہور(پ ر)جمعیت علما ئے پاکستان شعبہ خواتین کی مرکزی صدر سیدہ فائزہ نقوی نے کہا ہے کہ فاطمہ زہرا سلام اللہ علیہا صرف مسلمان ہی نہیں بلکہ کائنات کی تمام خواتین کے لئے نمونہ عمل اور رول ماڈل ہیں۔اہل بیتؑ کو قرآن مجید میں طہارت و پاکیزگی سے مزین قراردیا گیاہے۔ بی بی فاطمہ ؑ،طاہرہ،صدیقہ، راضیہ، مرضیہ،مطہرہ ہیں۔فاطمۃ الزہراؑ،بعد از وفات رسولؐ اپنے شوہر نامدار حضرت علی علیہ السلام کے لئے غمگسار اور ہمدرد ثابت ہوئیں۔خاتون جنت کے یوم ولادت کی مناسبت سے منعقد ہ تقریب سے خطاب میں انہوں نے کہا کہ بی بی فاطمہؑ اسلام کی حفاظت کرنے والی ہیں،کفار مکہ رسول اللہؐ کو نرینہ اولاد نہ ہونے کا طعنہ دیتے تو اللہ تعالی نے کفار مکہ کا منہ بند کرنے کے لئے سورہ کوثر نازل کی، جس میں اللہ تعالی نے فرمایا کہ کوثر یعنی فاطمہ الزہراؑ آپ ؐکو عطاکی ہے۔ آپ کا دشمن ہی بے نسل رہے گا۔ پیغمبرؐ کی نسل ِسادات بیٹی سے چلی۔ وہ ایسی بیٹی جو اپنے باپ کے لیے فخر ہیں۔حضرت علی علیہ السلام فرماتے ہیں کہ وہ کبھی فاطمہ ؑسے ناراض نہیں ہوئے اور فاطمہ ؑبھی کبھی ان سے ناراض نہیں ہوئیں۔