الیکشن فرقہ وارانہ بنیاد پر ہوئے تو امن خطرہ میں پڑجائے گا، پیپلزپارٹی

گلگت (نیوز ڈیسک) گلگت بلتستان کے حلقہ گلگت ایک میں کالعدم تنظیم سپاہ صحابہ کھلے عام کام کرنے لگی لیکن تمام اداروں نے اس سے آنکھیں بند کررکھی ہیں ،تنظیم کا سرغنہ محمد احمد لدھیانوی گلگت پہنچا جہاں اس نے انتخابی مہم چلائی بلکہ نماز جمعہ کے اجتماع سے خطاب بھی کیا،اس حلقہ سے مشترکہ امیدوار لانے کی کوشش کی جارہی ہے،2015کے الیکشن میں اس حلقہ سے نون لیگ کے ٹکٹ پر کامیاب امیدوار اور سابق ڈپٹی اسپیکر جعفر اللہ نے احمد لدھیانوی کو یقین دہانی کرائی ہے کہ اگر کوئی متفقہ فیصلہ ہوا تو وہ سپاہ صحابہ کے امیدوار کے حق میں دستبردار ہوجائیں گے، پیپلزپارٹی گلگت بلتستان کے صدر امجد حسین ایڈووکیٹ نے کہا ہے کہ ایک بار پھر الیکشن کو فرقہ وارانہ بنانے کی مذموم کوشش ہو رہی ہے، اگر اس مرتبہ بھی گلگت حلقہ ایک میں الیکشن فرقہ وارانہ بنیادوں پر ہوئے تو اس خطے میں امن کی کوئی گارنٹی نہیں دے سکتے ،امجد حسین ایڈووکیٹ کا کہنا تھا کہ ہم نے متعلقہ اداروں سے مطالبہ کیا ہے کہ اس حلقے میں سیاسی عمل کو پنپنے کا موقع دیا جائے اور تمام امیدواروں کو الیکشن لڑنے کا حق ملنا چاہیئے