انتقام کے منتظر رہیں، آخری دم تک لڑیں گے، جنرل حسین سلامی

تہران : سپاہ پاسداران انقلاب کے سربراہ جنرل حسین سلامی نے کہا ہے کہ آج ایک حقیقی اور تاریخی محاذ آرائی جاری ہے۔ گذشتہ 45 سالوں کے دوران انقلاب اسلامی نے ثابت کیا ہے کہ ہر مشکل گھڑی اور سخت حالت میں انقلابی مرد و عورت سب جرائت اور بہادری کے ساتھ میدان میں ہیں۔ جنرل سلامی نے کہا کہ دشمن کی شدید اقتصادی پابندیوں کو بھی ہم نے غیرت اور حوصلے کے ساتھ عبور کیا۔ آج دشمن ہمارے قلوب اور اذہان کو نشانہ بنارہے ہیں لیکن ہم دشمن کو کبھی موقع نہیں دیں گے۔ انہوں نے کہا کہ بسیج نے فتنوں اور خطرات کا مقابلہ کرتے ہوئے اسلام اور ایران کی حفاظت کی ہے۔ جب تک بسیج ہے امریکہ اور اس کے اتحادی ہمارا بال بھی بیکا نہیں کرسکتے ہیں۔ میجر جنرل سلامی نے زور دیتے ہوئے کہا کہ آج ایک حقیقی اور تاریخی محاذ آرائی جاری ہے۔ اسلام اور ایمان کے لئے دشمنوں کے سامنے ڈٹ جانے والوں کی مقاومت غیر معمولی داستانیں قلمبند کر رہی ہے۔ البتہ ہم دشمن سے کہتے ہیں کہ تاریخ کا مطالعہ کریں۔ کبھی مسلمانوں نے کفار، مشرکین اور منافقین کے سامنے سر تسلیم خم نہیں کیا۔ سپاہ پاسداران انقلاب کے کمانڈر انچیف نے مزید کہا کہ تم ٹوٹ جاؤ گے اور مسلمانوں کے مقابلے میں زندہ نہیں رہ سکو گے۔ آج تم گھروں کو تباہ کرتے ہو، شہروں اور دیہاتوں تباہ کرتے ہو اور مظلوم مسلمانوں کو ملبے تلے دفن کرتے ہو لیکن جان لو محصور اور بے دفاع غزہ کی پٹی میں 40 ہزار فلسطینیوں کے قتل کے بعد ایک لاکھ فلسطینی بچے پیدا ہوں گے۔ وہ پیدا ہوتے ہی جہاد کا سبق سیکھیں گے اور جیسے ہی چلنے کے قابل ہو جائیں، جہاد کا جھنڈا اٹھا لیں گے۔ انہوں نے کہا کہ آپ لبنان کے حزب اللہ کے جوانوں کی عظمت دیکھیں جنہوں نے گزشتہ مہینوں میں صیہونی حکومت کی ناک زمین پر رگڑ کر رکھ دی۔ دشمن نے سوچا تھا کہ سید مقاومت اور کمانڈروں کی شہادت سے یا اس کے کچھ نوجوانوں کو پیجرز دھماکے میں شہید کرکے حزب اللہ کو ختم کردیں گے۔