Raza Musani 
تہران : ایرانی وزیر خارجہ حسین امیر عبد اللہیان نے کہا ہے کہ ایران ویانا مذاکرات میں اس بات کی ضمانت چاہتا ہے کہ پابندیاں ہٹانے کے بعد نئی پابندیاں عائد نہیں کی جائیں گی۔الجزیرہ نیوز نیٹ ورک کے ساتھ ایک خصوصی انٹرویو میں حسین امیر عبداللہیان کا کہنا تھا کہ ہم ان پابندیوں کو ہٹانے کے خواہاں ہیں جو ٹرمپ کی طرف سے ایران پر لگائی گئی تھیں خاص طور پر وہ پابندیاں جو جوہری معاہدے سے متصادم ہیں۔ ہم اس بات کی ضمانت بھی چاہتے ہیں کہ کوئی نئی پابندیاں عائد نہیں کی جائیں گی اور نہ ہی موجودہ پابندیاں ہٹانے کے بعد دوبارہ عائد کی جائیں گی۔ ایران کے وزیر خارجہ نے کہا کہ ویانا مذاکرات میں ایران کی طرف سے مانگی گئی ضمانتوں میں سے تیل کی برآمدات اور محصولات کی واپسی میں سہولت فراہم کرنا شامل ہے۔ ویانا مذاکرات کا آٹھواں دور درست راستے پر ہے۔ اگر مغربی فریق سنجیدہ عزم کا مظاہرہ کریں تو اچھے معاہدے کا حصول ممکن ہے۔ انہوں نے صیہونی دھمکیوں سے متعلق سوال پر کہا کہ ایران کے خلاف اسرائیلی دھمکیاں کوئی نئی بات نہیں۔ اسرائیل دھمکیوں کو عملی جامہ پہنانے کی پوزیشن میں نہیں، سعودی عرب کے ساتھ مذاکرات مثبت انداز میں بڑھ رہے ہیں سعودی عرب کے ساتھ تعلقات بحال کرنے کے لیے ہر وقت تیار ہیں، خطے کے مسائل کے حل کے لیے مذاکرات میں مصر اور ترکی کو شامل کرنا چاہتے ہیں۔ او آئی سی میں ایرانی مندوب جلد جدہ پہنچ جائیگا، جو مثبت پیش رفت ہے۔
