Raza Musani 
واشنگٹن ؛ امریکی اخبار وال اسٹریٹ جرنل کے مطابق امریکی نائب صدر جے ڈی وینس ایرانی سپریم نیشنل سکیورٹی کونسل کے سیکریٹری محسن رضائی کے ساتھ براہِ راست ملاقات اور مذاکرات پر غور کر رہے ہیں۔ اس پیشرفت کا مقصد ایران کے ساتھ جاری جنگ کے خاتمے کے لیے سفارتی راستہ تلاش کرنا ہے۔
رپورٹ میں امریکی اور مشرقِ وسطیٰ کے حکام کے حوالے سے بتایا گیا ہے کہ صدر ڈونلڈ ٹرمپ نے حالیہ دنوں میں اپنے اعلیٰ معاونین اور دیگر رہنماؤں کو آگاہ کیا ہے کہ وہ ایران کے ساتھ مذاکرات دوبارہ شروع کرنے کے حق میں ہیں اور اس سلسلے میں وینس کو مرکزی کردار سونپ دیا ہے۔ رپورٹ کے مطابق وینس نے گزشتہ ماہ محسن رضائی کو ایک خط بھیجا تھا جس میں ملاقات کی تجویز دی گئی تھی، تاہم براہِ راست مذاکرات کے حوالے سے بات چیت ابھی ابتدائی مرحلے میں ہے اور ملاقات کی کوئی تاریخ طے نہیں ہوئی۔ ممکنہ ملاقات کے لیے قطر کا دارالحکومت دوحہ زیرِ غور ہے، جبکہ دونوں ممالک کے درمیان رابطے ثالثوں کے ذریعے جاری ہیں۔
وال اسٹریٹ جرنل کے مطابق وینس اب ایران کے ساتھ سفارتی رابطوں میں وائٹ ہاؤس کے خصوصی نمائندوں اسٹیو وٹکوف اور جیرڈ کشنر کے مقابلے میں زیادہ فعال کردار ادا کر رہے ہیں۔ دوسری جانب امریکی وزیر خارجہ مارکو روبیو اور وائٹ ہاؤس کے چیف آف اسٹاف اسٹیفن ملر ایران پر اقتصادی دباؤ اور پابندیاں برقرار رکھنے کے حامی ہیں۔ رپورٹ میں بتایا گیا ہے کہ ایران نے مذاکرات کی بحالی کے لیے امریکی بحری ناکہ بندی ختم کرنے، منجمد اثاثے جاری کرنے اور تیل پر عائد پابندیوں میں نرمی کی شرائط رکھی ہیں۔ امریکی وزیر خارجہ مارکو روبیو نے ان مطالبات کو غیر حقیقت پسندانہ قرار دیا ہے۔ مشرقِ وسطیٰ کے ثالثوں نے اعتماد سازی کے لیے ایک تجویز بھی پیش کی ہے، جس کے تحت امریکا اپنے طیارہ بردار بحری جہاز ایران سے دور لے جانے اور ایرانی بندرگاہوں کی ناکہ بندی میں نرمی پر غور کر سکتا ہے، جبکہ اس کے بدلے ایران آبنائے ہرمز سے 25 تیل بردار جہازوں کو گزرنے کی اجازت دے سکتا ہے.
رپورٹ کے مطابق ایرانی حکام کو امریکا کے ساتھ کسی معاہدے کے امکانات پر تحفظات ہیں اور انہیں خدشہ ہے کہ مذاکرات کے باوجود امریکا دوبارہ فوجی کارروائی شروع کر سکتا ہے۔
