آبنائے ہرمز میں ممنوعہ راستے سے گزرنے کی کوشش، تیل بردار جہاز بارودی سرنگ سے ٹکرا گیا

تہران : ایرانی بحریہ نے دعویٰ کیا ہے کہ بدھ کی صبح آبنائے ہرمز کے مشرق میں بحری بارودی سرنگ سے ٹکرانے کے بعد ایک تیل بردار جہاز میں آگ لگ گئی۔ بحریہ کے شعبۂ تعلقات عامہ کی جانب سے جاری بیان میں اس آئل ٹینکر کو خلاف ورزی کرنے والا قرار دیا گیا ہے اور دعویٰ کیا گیا ہے کہ جہاز ایک ’غیر محفوظ اور ممنوعہ‘ علاقے میں موجود تھا جہاں وہ بارودی سرنگ سے ٹکرایا۔ ایرانی حکام نے اپنے بیان میں ایک بار پھر زور دیتے ہوئے کہا ہے کہ آبنائے ہرمز سے جہازوں کی محفوظ آمد و رفت کے لیے ایرانی مسلح افواج کے ساتھ رابطہ اور بحری قوانین کی پابندی ضروری ہے۔ اس سے قبل برطانیہ کے میری ٹائم ٹریڈ آپریشنز سینٹر (یو کے ایم ٹی او) نے کہا تھا کہ اسے آبنائے ہرمز میں ایک آئل ٹینکر سے متعلق ’مشتبہ واقعے‘ کی اطلاع ملی ہے اور اس بارے میں تحقیقات جاری ہیں۔