Raza Musani 
نیویارک : انسانی حقوق کی عالمی تنظیم ایمنسٹی انٹرنیشنل نے امریکی صدر جو بائیڈن سے مطالبہ کیا ہے کہ وہ گوانتانامو بے جیل بند کرنے کا انتخابی وعدہ پورا کریں لیکن امریکی قانون ساز اس فیصلے کے خلاف ہیں۔ کیوبا میں بنائی گئی اس جیل کا مقصد دہشت گردی کے خلاف جنگ کے دوران مشتبہ غیرملکی دہشت گردوں کو حراست میں لے کر تفتیش کرنا تھا تاہم اس متنازع جیل میں اختیار کیے گئے تفتیشی طریقے تشدد کے سوا کچھ نہیں۔ ایمنسٹی انٹرنیشنل امریکا کے انسانی حقوق سے متعلق پروگرام میں سیکیورٹی ڈائریکٹر ڈیفنی ایویاٹار کہتی ہیں کہ جب تک یہ جیل برقرار رہے گی تب تک عالمی سطح پر انسانی حقوق کے بارے میں امریکی ساکھ متاثر ہوتی رہے گی۔یہ جیل 12 جنوری 2002ء کو قائم کی گئی تھی اور تب سے اب تک یہاں 780 افراد کو حراست میں رکھا جا چکا ہے جن میں زیادہ تر پر فرد جرم بھی عائد نہیں کی گئی۔اس وقت بھی اِس جیل میں 39 افراد قید ہیں جن میں 11 ستمبر کے دہشت گرد حملوں کا مبینہ ماسٹر مائنڈ خالد شیخ محمد بھی شامل ہے۔
