ایک گھر سے تین شہید ایثار اور فداکاری کا بہترین نمونہ ہے، ولی امر المسلمین

تہران : ولی امر المسلمین آیت اللہ سید علی خامنہ ای نے یمن میں ایرانی سفیر حسن ایرلو کی کورونا وائرس سے شہادت پر تعزیت و تہنیت پیش کی ہے۔ ولی امر مسلمین نے شہید حسن ایرلو کے لواحقین اور احباب کو تعزیت اور تسلیت پیش کرتے ہوئے کہا کہ شہید حسن ایرلو نے سیاسی، سفارتی اور سماجی میدانوں میں بھر پور کوشش اور جدوجہد کے شاندار نقوش رقم کئے جو ان کی مجاہدانہ زندگی کا بہترین نمونہ ہیں۔ ایک گھرسے تین شہید ایثار اور فداکاری کا بہترین نمونہ ہے۔ شہید کے دو بھائی بھی اس سے قبل درجہ شہادت پر فائز ہوچکے ہیں۔ اللہ تعالی اس صابر، بصیر اور فداکار خاندان پر رحمت نازل فرمائے۔ اس سے قبل صدر سید ابراهیم رئیسی ، اسپیکر محمد باقر قالیباف اور وزیر خارجہ حسین امیر عبداللہیان نے بھی حسن ایرلو کی شہادت پر تعزیت پیش کرتے ہوئے کہا تھا کہ حسن ایرلو نے یمنی عوام کی مظلومیت اور حقانیت کے دفاع میں بھر پور کردار ادا کیا۔