Raza Musani 
غزہ : صیہونی فوج نے شجاعیہ میں بڑا آپریشن شروع کردیا ہے۔ فوجی ٹینک اور بکتر بند گاڑیاں علاقے میں داخل ہوگئی ہیں۔ صیہونی نے گذشتہ روز فلسطینیوں کو علاقہ خالی کرنے کا حکم دیا تھا۔ انخلا کے حکم کے بعد شجاعیہ پر فضائی حملے کئے اور گولہ باری سے رہائشی عمارتوں کو نشانہ بنایا۔ جس سے کئی عمارتیں گر گئیں اور متعدد فلسطینی شہید ہوگئے۔ اب تک بائیس لاشیں اسپتال پہنچائے جانے کی تصدیق ہوئی ہے ادھر صیہونی فوج نے البریج کیمپ پر فضائی حملہ کیا۔ جس میں بارہ افراد شہید اور کئی زخمی ہوئے۔ المواصی پر حملے میں گیارہ فلسطینی شہید اور متعدد زخمی ہوئے ہیں۔ صیہونی فوج نے دیرالبلاح، خان یونس ،رفح سٹی، شمالی غزہ، بیت الاحیہ اور جبالیہ کو بھی فضائی اور زمینی حملوں کا نشانہ بنایا۔ دیرالبلاح میں عمارت پر حملے میں ایک ہی خاندان کے چار افراد شہید ہوگئے۔ فلسطینی وزارت صحت کے مطابق چوبیس گھنٹوں کے دوران کئے گئے حملوں میں 82 فلسطینی شہید اور متعدد زخمی ہوئے۔
