Raza Musani 
پنجاب بھر کی تمام جیلوں میں محرم الحرام کی مناسبت سے مجالس عزاء اور جلوس ہائے عزا کے انعقاد کے حوالے سے خصوصی ہدایات جاری کی گئی ہے۔ آئی جی جیل نے تمام سپرٹنڈنٹ جیل کو مراسلہ جاری کر دیا ہے۔ مراسلے میں ہدایت کی گئی ہے کہ سپرٹنڈنٹ جیل سمیت تمام اسٹاف صبح سے شام تک ڈیوٹی پر موجود رہے گا، کسی بھی افسر یا ملازم کو چھٹی پر نہیں بھیجا جائے گا۔ مراسلے میں ہدایت کی گئی ہے کہ ایک ڈیوٹی افسر ہمہ وقت اہل تشیع کی مجلس کی جگہ پر موجود رہے گا۔
مراسلے میں کہا گیا ہے کہ کسی بھی ناگہانی صورتحال سے نمٹنے کیلئے ریزرو فورس تشکیل دی جائے اور سپرنٹنڈنٹ جیل ضلعی انتظامیہ سے بھی رابطے میں رہے گا۔ آئی جی جیل نے ہدایت کی ہے کہ میڈیکل آفیسر اہل تشیع کی مجالس کیلئے سہولیات کا بندوبست رکھیں گے، مجالس کیلئے نوحہ خواں، ذاکر اور عالم دین کا انتظام جیل سے ہی کیا جائے گا جبکہ ہر قسم کا سامان مکمل تلاشی کے بعد ہی جیل کے اندر بھیجا جائے گا۔ مراسلے میں کہا گیا ہے کہ کسی بھی ناگہانی صورتحال پر ریجنل ڈی آئی جی بذات خود موقع پر پہنچیں گے۔
