صیہونی آبادکاری میں توسیع کا فیصلہ امن کیلئے نقصاندہ قرار

ریاض: سعودی عرب ۔ قطر اور مصر نے صیہونی آبادکاری میں توسیع کے فیصلے کو امن کیلئے نقصاندہ قرار دیا ہے۔ سعودی وزارت خارجہ سے جاری بیان میں کہا گیا ہے کہ اسرائیلی کابینہ اور وزارت برائے قومی سلامتی کو فلسطینی علاقوں میں آباد کاری کے نئے منصوبوں کی اجازت دینا خطے میں امن کے حصول کے لیے کی جاری کوششوں کو نقصان پہنچانے کے مترادف ہے۔ وزارت خارجہ نے بین الاقوامی قانون اور سلامتی کونسل کی قراردادوں کی روشنی میں متنازع آباد کاری کی اسرائیلی خلاف ورزیوں کا نوٹس لینے پر زور دیا۔ سعودی بیان میں خبردار کیا گیا ہے کہ فلسطینی علاقوں میں آباد کاری کے متنازع اقدامات کے سنگین نتائج برآمد ہوں گے۔ قطری وزارت خارجہ نے اپنے بیان میں کہا کہ صیہونی بستیوں میں توسیع ۔ فلسطینیوں کو زبردستی بے گھر کرنے کی پالیسی۔ غزہ کی وحشیانہ جنگ خطے میں تشدد کے چکر کو پھیلنے سے روکنے کی کوششوں میں رکاوٹیں ہیں۔ مصری وزارت خارجہ نے کہا کہ اسرائیلی فیصلہ بین الاقوامی قانون اور سلامتی کونسل کی قراردادوں کی خلاف ورزی کی پالیسی جاری رکھنے کا ثبوت ہے ۔