Raza Musani 
غزہ : صیہونی فوج نے بیت لاہیہ پر ایک اور حملہ کیا ہے۔ جس میں چھ فلسطینی شہید اور سات زخمی ہوگئے۔ صبح سے جاری حملوں میں شہدا کی تعداد 23 ہوگئی ہے۔ صیہونی جنگی طیاروں نے بیت لاہیہ میں ایک مکان کو نشانہ بنایا جس سے وہ تباہ ہوگیا۔ حملے میں سات فلسطینی زخمی بھی ہوئے۔ اس سے پہلے جنگی طیاروں نے صبح سویرے رفح۔ بیت لاہیہ اور وسطیٰ غزہ کی رہائشی عمارتوں پر بم برسائے۔ ڈرون سے فائرنگ کی گئی اور میزائل داغے گئے۔ تازہ حملوں میں چالیس سے زائد فلسطینی زخمی ہوئے۔ اسرائیلی فوج نے دعویٰ کیا ہے کہ بیت لاہیہ اور جبالیہ میں کارروائی کے دوران حماس کے پچاس سے زائد مزاحمت کاروں کو مار دیا ہے۔ لڑائی میں مصروف فوجی ڈویژن کارروائیوں کو وسعت دے رہا ہے۔
ادھر اقوام متحدہ کی ایجنسی اُنروا کی رکن لوئیس واٹریج نے کہاہے کہ شمالی غزہ میں پورا معاشرہ اب ایک قبرستان بن چکا ہے۔ آپ غزہ شہر میں کہیں سے بھی داخل ہوں، گھر۔اسپتالوں، اسکول ۔طبی مراکز۔ مساجد۔ اپارٹمنٹس اور ریستوران سمیت سب ملیا میٹ ہوچکا ہے۔
