طوفان الاقصیٰ نے صیہونی فوج کا بھرم خاک میں ملادیا، فلسطین کی آزادی تک مزاحمت جاری رہے گی، حماس

غزہ : حماس رہنما خلیل الحیا نے کہاہے کہ آپریشن طوفان الاقصیٰ نے صیہونی فوج کا بھرم خاک میں ملادیا اور اس کی فوجی برتری ختم کردی۔ آپریشن کو انجام دیتے ہوئے فلسطینی جنگجوؤں نے بہادرانہ کارروائیاں کیں جس نے طاقت کا توازن بدل کر رکھ دیا۔ آپریشن طوفان الاقصیٰ کے ایک سال بعد بھی حوصلے بلند ہیں۔ فلسطینی سرزمین کی آزادی کیلئے مزاحمت جاری رہے گی۔ انہوں نے کہا کہ اسرائیل زور،طاقت اور جبر سے کوئی حل ہم پر مسلط نہیں کرسکتا ۔ آزاد فلسطینی ریاست کے قیام سے کم کسی حل کو کبھی قبول نہیں کریں گے۔ انہوں نے کہا کہ ہمارا مقصد واضح ہے، ہم اپنی سرزمین اور مقدس مقامات کی مکمل آزادی، خودمختاری، آزاد فلسطینی ریاست کے قیام اور پناہ گزینوں کی ان کے وطن واپسی کے خواہاں ہیں۔ حماس کے عہدیدار نے زور دے کر کہا کہ حکومت طاقت کے ذریعے اپنے مقاصد کو حاصل کرنے میں کامیاب نہیں ہوئی اور نہ ہی ہوسکے گی۔ ایک سال بعد بھی ہمارے لوگ اپنی مزاحمت، خون اور ثابت قدمی سے تاریخ کا ایک نیا باب لکھ رہے ہیں۔