عارضی جنگ بندی کے لئے بات چیت غیر معقول ہے، حماس

بیروت : حماس کے پولیٹیکل بیورو کے رکن اسامہ حمدان نے عارضی جنگ بندی کے حوالے سے بات چیت کو غیر معقول قرار دیا ہے۔ لبنان کے ٹی وی المیادین کو انٹرویو میں اسامہ حمدان نے کہا کہ حالیہ جنگ بندی کے مذاکرات صرف مجوزہ تجاویز تک محدود ہیں جو فلسطینی مزاحمت کے مطالبات سے مطابقت نہیں رکھتے ہیں۔انہوں نے کہا کہ ہمارے سامنے پیش کردہ تجاویز میں جامع جنگ بندی کی بات شامل نہیں ہے۔ عارضی جنگ بندی کے حوالے سے بات چیت غیر معقول ہے، کیونکہ مزاحمت فلسطینی عوام پر جارحیت کو مکمل طور پر روکنا چاہتی ہے۔ انہوں نے حتمی معاہدے کیلئے سنجیدہ تجاویز پر بات چیت کیلئے آمادگی کا اعادہ کیا۔ اسامہ حمدان نے کہا کہ کوئی بھی غیر سنجیدہ تجاویز وقت کا ضیاع ہوگی۔ حمدان نے انکشاف کیا کہ حماس کی قیادت یحییٰ السنوار کے پیش کردہ سابقہ فریم ورک کی بنیاد پر اپنے فیصلے کرتی رہتی ہے۔ انہوں نے کہا کہ وائٹ ہاؤس نے صدارتی انتخابات کے نتائج پر اثر انداز ہونے اور لبنان اور غزہ کے محاذوں کو الگ کرنے کے لیے جنگ بندی کی بات چیت کا فائدہ اٹھانے کی کوشش کی ہے۔ حمدان نے زور دے کر کہا کہ واشنگٹن ایسا کرنے میں کامیاب نہیں ہوا۔