Raza Musani 
لاہور: محرم الحرام میں امن و امان کی صورتحال برقرار رکھنے کیلئے لاہور پولیس نے دیگر قانون نافذ کرنیوالے اداروں کے ہمراہ مشترکہ سرچ اینڈ سویپ آپریشنز کئے۔ سی سی پی او لاہور بلال صدیق کمیانہ کے حکم پر رات گئے کئے جانیوالے سرچ اینڈ سویپ آپریشنز میں پولیس، اسپیشل برانچ، سی ٹی ڈی اور حساس اداروں کے اہلکاروں نے حصہ لیا۔ سرچ آپریشنز شاہدرہ، شفیق آباد، لاری اڈہ، بادامی باغ، رائیونڈ سٹی، اسلامپورہ، اقبال ٹاؤن، نصیر آباد اور گلبرگ سمیت دیگر علاقوں میں کئے گئے۔
سرچ آپریشن کے دوران شہریوں کی بائیو میٹرک تصدیق کی گئی، شناختی اور کرایہ داری کوائف کی جانچ پڑتال بھی کی گئی۔ اس موقع پر بس اڈوں، فیکٹریوں، گوداموں، ہوٹلوں، گیسٹ ہاؤسز اور فلیٹس کی خصوصی چیکنگ کی گئی۔ سی سی پی او بلال صدیق کمیانہ کا کہنا ہے کہ محرم الحرام کے حفاظتی انتظامات کے پیش نظر شہر بھر کی سیکیورٹی ہائی الرٹ ہے۔ شہر کے داخلی و خارجی راستوں پر اضافی نفری تعینات کر کے مشکوک گاڑیوں کی چیکنگ کا سلسلہ بھی جاری ہے۔
