Raza Musani 
روہڑی: سندھ کے شہر روہڑی میں نو محرم کے قدیمی جلوس میں دم گھٹنے سے 6 عزادار شہید اور درجنوں بے ہوش ہوگئے۔ شہدا میں دو سگے بھائی منصور سولنگی اور ذوالفقار سولنگی بھی شامل ہیں۔ دیگر شہدا کی شناخت کامران علی، حاکم علی، حسن پٹھان اور دل شیر کے نام سے ہوئی ہے۔ نو محرم الحرام کا تاریخی جلوس منڈو کھبڑ سے برآمد ہوا جس میں مختلف شہروں سے آئے ہزاروں افراد شریک ہوئے۔ تنگ گلیوں سے گذرنے والے جلوس میں حادثہ شدید گرمی کی وجہ سے پیش آیا۔ شدید گرمی اور دم گھٹنے کے سبب تعزیہ کی زیارت کے دوران درجنوں عزادار گر کر بے ہوش ہوگئے۔ پیروں تلے کچلے جانےسے کئی عزادار زخمی ہوئے۔ بے ہوش اور زخمی عزاداروں کو طبی کیمپوں میں منتقل کر دیا گیا۔ جہاں سے جاں بحق افراد اور زخمیوں کو تعلقہ اسپتال منتقل کردیا گیا جس کے بعد لوگوں کی بڑی تعداد اسپتال پہنچ گئی۔
