Raza Musani 
ماسکو : روسی صدر ولادیمیر پیوٹن نے جنگ بندی کیلئے یوکرینی ہم منصب زیلنسکی سے ملاقات پر آمادگی ظاہر کردی۔ چین سے واپسی کے موقع پر گفتگو میں پیوٹن نے کہا کہ انہوں نے زیلنسکی سے ملاقات کے امکان کو کبھی رد نہیں کیا۔ زیلنسکی ماسکو آئیں تو مذاکرات ہو سکتے ہیں تاہم یہ ملاقات مفید اور بامعنی ہونی چاہیے۔ لیکن اگر کوئی امن معاہدہ نہیں ہوا تو ماسکو عسکری طور پر اپنے مقاصد حاصل کر لے گا۔
یوکرین نے زیلنسکی کے ماسکو جانے کی تجویز ناقابل قبول قرار دے دی۔ یوکرینی وزیر خارجہ نے کہا کہ سات ممالک مذاکرات کےلیے میزبان بننے کو تیار ہیں اور زیلنسکی پیوٹن سے فوری ملاقات کےلیے تیار ہیں۔ ترجمان نے کہا کہ پیوٹن جان بوجھ کر ناقابل قبول تجاویز دے کر سب کو گمراہ کر رہے ہیں، صرف بڑھتا ہوا دباؤ ہی روس کو بالآخر امن عمل کے بارے میں سنجیدہ ہونے پر مجبور کر سکتا ہے۔
