اسرائیل کی مرضی کے بغیر فلسطینی ریاست قائم نہیں ہوسکتی، امریکا

واشنگٹن : امریکی وزیر خارجہ مارکو روبیو نے واضح طور پر کہا ہےکہ اسرائیل کی مرضی کے بغیر کوئی فلسطینی ریاست قائم نہیں ہوسکتی۔ فوکس نیوز کو انٹرویو میں مارکو روبیو نے برطانیہ، فرانس اور کینیڈا کی جانب سے فلسطینی ریاست کو تسلیم کرنے کے منصوبوں کو بے سود قرار دیا ہے۔
امریکی وزیرخارجہ نے کہا کہ کوئی بھی ملک فلسطینی ریاست قائم کرنے کی صلاحیت نہیں رکھتا اور فلسطینی ریاست تب تک ممکن نہیں جب تک اسرائیل اسے تسلیم نہ کرے۔ انہوں نے کہا کہ دوسری بات یہ ہے کہ وہ اس ریاست کی جگہ کا تعین نہیں کر سکتے نہ ہی یہ طے کر سکتے ہیں کہ اسے کون چلائے گا۔ انھوں نے یہ بھی کہا کہ فلسطینی ریاست کو تسلیم کرنا حماس کے لیے انعام ہے اور اس سے اسے غزہ میں جنگ بندی قبول نہ کرنے پر مزید حوصلہ ملے گا۔