Raza Musani 
جدہ : اسلامی تعاون تنظیم نے آرمینیا کی جانب سے فلسطین کو آزاد ریاست تسلیم کرنے کا خیرمقدم کیا ہے۔ او آئی سی نے فلسطین کو تسلیم کرنے کے آرمینیا کے فیصلے کو ایک اہم قدم قرار دیا ہے۔ او آئی سی کے بیان میں کہا گیا ہےکہ یہ اقدام بین الاقوامی قانون اور متعلقہ اقوام متحدہ کی قراردادوں کے مطابق ہے۔ بیان میں کہا گیا ہےکہ آرمینیا کا اقدام اسرائیلی قبضے کو ختم کرنے، فلسطینی عوام کو ان کے جائز حقوق کے ساتھ بااختیار بنانے کے لیے بین الاقوامی کوششوں اور پوزیشنوں میں تعاون کرتا ہے۔ او آئی سی نے کہا ہے کہ آرمینیا کے فیصلے سے 1967 کی حدود پر ایسی فلسطینی ریاست جس کا دارالحکومت القدس ہو کے قیام کی راہ ہموار کرنے میں مدد ملے گی۔ اسلامی تعاون تنظیم نے دنیا کے ان تمام ممالک جنہوں نے ابھی تک ریاست فلسطین کو تسلیم نہیں کیا ہے سے ایک مرتبہ پھر مطالبہ کیا کہ وہ اسے تسلیم کریں اور اقوام متحدہ میں فلسطین کی مکمل رکنیت کے حق کی حمایت کریں۔
