Raza Musani 
مکہ : اٹھارہ لاکھ سے زائد حجاج نے فریضہ حج ادا کرلیا۔ حجاج کرام نے ہفتہ اور اتوار کی درمیانی شب مزدلفہ میں گذاری اور پوری رات عبادت اور رمی جمرات کیلئے کنکریاں جمع کرنے کے بعد آج صبح دوبارہ منیٰ پہنچے حجاج کرام نے بڑے شیطان کو کنکریاں مارنے اور قربانی کرنے کے بعد سر منڈوا کر احرام کھول دئے۔ حجاج کرام کی منی واپسی مناسک مکمل کرکے احرام کھولنے کا سلسلہ دن بھر جاری رہا۔ ادھر سعودی عرب سمیت خلیجی ممالک میں آج عید الاضحیٰ ادا کی جارہی ہے۔ عید کا سب سے بڑا اجتماع مسجد الحرام میں ہوا جس میں لاکھوں افراد نے شرکت کی۔ اس موقع پر اسلام کی سر بلندی، امتِ مسلمہ کی سلامتی اور ترقی کے لیے خصوصی دعائیں کی گئیں۔
پاکستان۔ ہندوستان سمیت کئی ممالک میں عید الاضحیٰ کل ہوگی۔ امریکا اور یورپ میں مسلم کمیونٹی کے بعض لوگ آج عید منارہے ہیں جبکہ دیگر ممالک میں مسلمان کل عید منائیں گے۔
