میانمار میں روہنگیا مسلمانوں پر مظالم کیخلاف اقوام متحدہ میں قراردادمنظور

میانمار حکومت روہنگیا مسلمانوں کے خلاف نفرت انگیزی کو روکے،جنرل اسمبلی کا مطالبہ
نیویارک(نیوزڈیسک) اقوام متحدہ کی جنرل اسمبلی نے میانمار میں روہنگیا مسلمانوں اور دیگر اقلیتوں کے انسانی حقوق کی پامالی کی مذمت کرتے ہوئے قرارداد منظور کرلی، 193 رکن ممالک کی جنرل اسمبلی میں 134 ممالک نے قرارداد کی حمایت کی، 9 ممالک نے مخالفت میں ووٹ دیا، جبکہ 28 ممالک نے رائے شماری میں حصہ نہیں لیا،قرارداد میں میانمار حکومت سے مطالبہ کیا گیا ہے کہ وہ روہنگیا مسلمانوں اور دیگر اقلیتوں کے خلاف نفرت انگیزی کو روکے،
قرارداد میں ایک آزاد بین الاقوامی مشن کی جانب سے کی گئی تفتیش کے نتیجے پر روشنی ڈالی گئی ہے کہ کس طرح ’روہنگیا مسلمانوں اور دیگر اقلیتوں کے انسانی حقوق کی صریح پامالی‘ میانمار کی سیکیورٹی فورسز کے ہاتھوں ہوئی ہے جسے مشن نے ’بین الاقوامی قانون کے تحت شدید ترین جرم‘ قرار دیا ہے،میانمار کے اقوام متحدہ کے سفیر ہاؤ ڈو سوان نے اس قرارداد کو ‘انسانی حقوق کے اصول کے تعلق سے ایک اور دوہرے معیار، منتخب اور امتیازی طرز عمل کی کلاسیکی مثال قرار دیا۔