پیرس اولمپکس کی تقریب سے قبل بڑا حملہ، ریلوے نظام مفلوج

پیرس :پیرس میں اولمپکس کی افتتاحی تقریب سے چند گھنٹے قبل ریل نیٹ ورک پر حملے سے ریلوے کا نظام مفلوج ہوگیا۔ فرانس کا تیزرفتار ترین ٹرین نیٹ ورک ٹی جی وی آتشزنی کے حملوں کی زد میں آگیا۔ شرپسندوں نے پیرس کو ملک کے مغرب، شمال اور مشرق سے ملانے والی لائنوں کے ساتھ واقع تنصیبات کو نشانہ بنایا۔ ریلوے اسٹیشن پر توڑ پھوڑ کی اور آگ لگائی گئی۔ ریل کمپنی ایس ای سی ایف کے حکام کا کہنا ہے کہ حملوں کا مقصد ٹرین نظام کو مفلوج کرنا تھا۔ ٹرینوں کی بڑی تعداد کو منسوخ کردیا گیا ہے۔ ریل کمپنی کا کہنا ہےکہ لندن اور پیرس کے درمیان ہر چار میں سے ایک یورو اسٹار ٹرین پیر تک معطل رہے گی جس سے ویک اینڈ پر آٹھ لاکھ مسافر متاثر ہوں گے۔ ریلوے کمپنی یورو اسٹار نے مسافروں کو سفر نہ کرنے کی ہدایت کردی ہے۔فرانسیسی وزیر اعظم گیبریل اٹل نے حملوں کو تخریب کاری قرار دیا اور کہاکہ انٹیلی جنس سروسز کو مجرموں کی تلاش کے لیے متحرک کر دیا گیا ہے۔