Raza Musani 
مجلس وحدت مسلمین پاکستان کے چیئرمین علامہ راجہ ناصر عباس جعفری و صوبائی صدر علامہ باقر عباس زیدی سمیت دیگر رہنماؤں نے سابق وزیراعظم عمران خان کی گرفتاری کی شدید مذمت کرتے ہوئے کہا ہے کہ ارض وطن بدترین حالات سے گزر رہا ہے اور حکمران سیاسی رسہ کشی میں لگے ہوئے ہیں۔ ملک و قوم ایک مرتبہ پھر سے مشرقی پاکستان جیسے سانحہ کے متحمل نہیں ہوسکتے، سابق وزیراعظم عمران خان کو گرفتار کرکے عوام کو حقیقی آزادی کی جدوجہد سے روکا نہیں جا سکتا، آئین و قانون شکن امپورٹڈ حکومت کے سہولت کاروں کے ہاتھوں عوامی مقبول سیاسی رہنما کی احاطہ عدالت سے گرفتاری انتہائی شرمناک ہے، جس سے واضح ہوتا ہے کہ بعض نامرئی قوتیں اپنے آپ کو آئین و قانون سے ماورا سمجھتی ہیں.
انہوں نے کہا ہے کہ عدالتوں کو مذاق بنانے والے عوام کے غیظ و غضب سے نہیں بچ سکیں گے، ایک طرف ملک لوٹنے والوں کی سرپرستی کی جا رہی ہے، دوسری طرف عوام اور پاکستان کے حقوق کے لئے جدوجہد کرنے والوں پر ظلم و بربریت کی انتہاء، یہ کسی بھی محب وطن پاکستانی کو قبول نہیں، اعلیٰ عدالتوں کو اس بدمعاشی کا فوری نوٹس لینا چاہیئے، یہ غیر منصفانہ رویہ کسی بھی جمہوری معاشرے میں ناقابل قبول ہے، اس اقدام سے صاف ظاہر ہے کہ ملک کو موجودہ بحرانی کیفیت سے نکالنے کے لئے کوئی بھی سنجیدہ اور مخلص نہیں ہے۔ رہنماؤں نے پاکستان سمیت پوری دنیا میں بسنے والے غیور پاکستانیوں سے اپیل ہے کہ وہ گھروں سے باہر نکلیں اور اس فاشسٹ رجیم اور ان کے سہولت کاروں سے ملک کو حقیقی آزادی دلانے کے لئے اپنی بھرپور عوامی طاقت کا مظاہرہ کریں۔
