Raza Musani 
تل ابیب: خفیہ اسرائیلی دستاویز میں انکشاف ہوا ہے کہ اسرائیلی فوج اور انٹیلی جنس کو حماس کے حملے اور ڈھائی سو شہریوں کے اغوا کا تین ہفتے پہلے علم ہوگیا تھا۔ اسرائیل کے کان پبلک براڈکاسٹر کی رپورٹ کے مطابق اسرائیلی فوج کے غزہ ڈویژن میں مرتب کی گئی دستاویز میں خبردار کیا گیا تھا کہ حماس اسرائیل پر بڑے پیمانے پر حملے کی تربیت کر رہی ہے جس کے دوران بڑے پیمانے پر یرغمالی بنائے جائیں گے۔ دستاویز میں مزید کہا گیا ہے کہ انٹیلی جنس کی اعلیٰ ترین سطح کو حملے سے قبل اس کی کچھ تفصیلات کا علم تھا۔ رپورٹ کے مطابق یہ دستاویز گذشتہ سال انیس ستمبر کو تقسیم کی گئی تھی اور اس میں حماس کے ایلیٹ یونٹس کی طرف سے کی جانے والی مشقوں کے سلسلے کو تفصیل سے بیان کیا گیا تھا۔ دستاویز کے مطابق مشقوں میں اسرائیلی قصبوں اور فوجی چوکیوں پر چھاپوں کے لیے ڈرلنگ اور غزہ کے اندر فوجیوں اور شہریوں کو یرغمال بنانے کے بارے میں تربیت دینا شامل ہے۔
