اسرائیل نے جنگ نہ روکی تو عالمی تنہائی کا شکار ہو جائے گا، اسرائیلی اپوزیشن لیڈر

تل ابیب: اسرائیلی اپوزیشن لیڈر یائیر لاپیڈ نے غزہ میں جاری جنگ اور وزیر اعظم نتن یاہو کی حکومت کی پالیسیوں پر سخت تنقید کرتے ہوئے خبردار کیا ہے کہ اگر اسرائیل نے جنگ کو فوری طور پر نہ روکا تو عالمی برادری اس پر اپنے دروازے بند کردے گی اور اسرائیل بین الاقوامی طور پر شدید تنہائی کا شکار ہوجائے گا۔ انہوں نے کہا کہ اسرائیل کو اس وقت ایک بڑی اسٹریٹجک شکست کا سامنا ہے، جو بالآخر عسکری اور سیاسی ناکامی میں تبدیل ہوسکتی ہے۔ اگر غزہ میں جنگ کا سلسلہ جاری رہا تو نہ صرف ہمارے یرغمالی واپس نہیں آئیں گے بلکہ ہم مزید فوجی کھودیں گے، انسانی المیہ سنگین تر ہوجائے گا اور دنیا ہم سے منہ موڑ لے گی۔ انہوں نے وزیر اعظم نتن یاہو پر شدید تنقید کرتے ہوئے کہا کہ ان کی حکومت جنگی جرائم کے الزامات کی زد میں ہے اور اس کی جنگی پالیسیوں نے اسرائیل کو تباہی کے دہانے پر لا کھڑا کیا ہے۔ لاپیڈ نے کہا کہ اسرائیل غزہ میں پہلے ہی شکست کھا چکا ہے، اور جو کچھ جاری ہے وہ کامیابی نہیں بلکہ مکمل تباہی اور اسٹریٹجک ناکامی ہے جو سیاسی و فوجی شکست پر منتج ہوگی۔