جنگ بندی معاہدے کے خاتمے کا ذمہ دار اسرائیل ہے، ہاریٹز

تل ابیب : اسرائیلی اخبار ہاریٹز نے جنگ بندی معاہدے کے خاتمے کا ذمہ دار اسرائیل کو ٹہرایا ہے۔ ہاریٹز نے اپنے اداریہ میں لکھا کہ حماس نہیں نیتن یاہو حکومت معاہدے کے نفاذ اور یرغمالیوں کی واپسی کو روک رہی ہے۔ اسرائیلی فوج نے ایک بار پھر حملے شروع کرکے جنگ بندی اور قیدیوں کے تبادلے کے معاہدے کو پارہ پارہ کر دیا۔ اخبار نے لکھا کہ جنگ بند کے سولہویں دن فریقین کو دوسرے مرحلے پر بات چیت شروع کرنی تھی لیکن اسرائیل نے انکار کردیا۔ اسرائیل نے فلاڈیلفی کوریڈور سے انخلا کا وعدہ بھی توڑا۔ اخبار نے لکھا کہ اسرائیل کے معاہدے کو برقرار رکھنے سے انکار کی وجہ سے امریکی ایلچی وٹکوف نے نئی تجاویز دیں۔ حماس کی جانب سے ان تجاویز کو مسترد کرنے کو جنگ دوبارہ شروع کرنے کا جواز قرار دینا بے ایمانی اور ہیرا پھیری کے سوا کچھ نہیں ہے۔ اخبار نے لکھا کہ اسیروں کی رہائی کیلئے جنگ شروع کرنے کا دعویٰ بھی جھوٹ ہے کیونکہ جنگ سے کوئی اسیر رہا نہیں ہوا۔ فوجی دباؤ یرغمالیوں کو خطرے میں ڈالتا ہے۔