اسرائیل ایرانی ایٹمی تنصیابت پر حملہ کا سوچے بھی نہیں، روس

ماسکو: روس نے اسرائیل کو خبردار کیا ہے کہ وہ ایرانی جوہری تنصیبات پر حملہ کرنے کے بارے میں سوچے بھی نہ۔ روسی نائب وزیر خارجہ سرگئی ریاب کوف نے کہاکہ ہم یہ بار بار انتباہ کر چکے ہیں کہ اسرائیل ایرانی تنصیبات پر حملہ کرنا تو درکنار اس بارے میں سوچنے سے بھی گریز کرے۔ اگر ایسا ہوا تو یہ ایک بہت بڑی تباہی پر مبنی پیش رفت ہوگی اور علاقے میں ان تمام اصولوں کی خلاف ورزی ہوگی جو علاقے کے ملکوں کا جوہری بموں سے تحفظ ممکن بناتے ہیں۔ انہوں نے کہاکہ روس اور ایران کے درمیان مسلسل رابطہ ہے اور یہ رابطہ خطے کی موجودہ کشیدگی کے علاوہ بھی ہر سطح پر رہتا ہے۔
واضح رہے کہ ایران نے اسرائیل پر یکم اکتوبر کو جوابی میزائل حملہ کیا تھا تو اس وقت سے یہ افواہیں موجود ہیں کہ اب اسرائیل ایک بار پھر ایران پر بھی حملہ کرے گا۔ اس سلسلے میں اسرائیل کے ایران میں ممکنہ اہداف بھی زیر بحث آرہے ہیں۔ جن میں ایرانی جوہری اور تیل سے متعلق تنصیبات اسرائیل کے نشانے پر آنے کا خدشہ ظاہر کیا جاتا ہے۔