کابل میٹرنٹی ہسپتال میں داعش کی دہشت گردی سفاکانہ وارادت ہے ،علامہ نیاز نقوی

لاہور (پ ر)وفاق المدارس الشیعہ پاکستان اور ملی یکجہتی کونسل کے مرکزی نائب صدر علامہ نیاز حسین نقوی نے کہا ہے کہ کابل میٹرنٹی ہسپتال میں داعش کی دہشت گردی نہایت سفاکانہ وارادت ہے۔ نوزائیدہ بچوں کی ٹارگٹ کلنگ سنگدلی کی انتہا ہے۔ داعش کی تاریخ ایسے ہی دل دہلا دینے والے مظالم سے بھری پڑی ہے جس میں زندہ انسانوں کی کھال اتارنے، انسانوں کو زندہ جلانے جیسے بہیمانہ جرائم شامل ہیں۔داعش کی سفاکیت کی مثالیں زمانہءجاہلیت کے وحشیوں سے بھی بد تر ہیں۔میڈیا سیل کی جانب سے جاری بیان میں انہوں نے کہا کہ ماہ مبارک رمضان المبارک میں معصوم بچوں کا سفاکانہ قتل انسانی المیہ ہے۔