غزہ میں چند گھنٹوں میں کئی عمارتیں ملیامیٹ، 33 فلسطینی شہید

غزہ : صیہونی فوج نے آج بھی بربریت کے مظاہرے جاری رکھے۔ چند گھنٹوں میں کئی عمارتیں ملیامیٹ اور تینتیس افراد شہید کردئے۔ اسرائیلی جنگی طیاروں نے شمالی غزہ کے علاقے الفتح میں میزائل داغ کر عمارت تباہ کردی۔ جس کے نتیجے میں پانچ افراد شہید اور کئی زخمی ہوگئے۔ خان یونس میں ایک مکان پر گولہ باری سے چار افراد جان سے گئے۔ بیت لاہیا میں بے گھر افراد کے ایک مکان پربمباری کے نتیجے میں 20 فلسطینی شہید ہو گئے۔ دیر البلح میں خیمہ بستی پر حملے میں دو فلسطینی شہید اور بچوں سمیت دیگر زخمی ہوگئے۔ خان یونس کے عبسان الکبیرہ قصبے میں ایک مکان پر بمباری کے نتیجے میں متعدد فلسطینی زخمی ہوئے ہیں۔ ادھر صیہونی فوج نے مغربی کنارے کے شہر پر ایک بار پھر چڑھائی کردی۔ جہاں مسلح مزاحمت کاروں اور فوجیوں میں شدید جھڑپیں ہوئیں۔ فائرنگ سے چھ فلسطینی مارے گئے جبکہ کئی زخمی ہوگئے