مراسلے کی تحقیقات نہ ہوئی تو کوئی وزیراعظم امریکا کے سامنے کھڑا نہیں ہوسکے گا، عمران خان

ڈیرہ غازی خان : تحریک انصاف کے چیئرمین اور سابق وزیراعظم عمران خان نے کہا ہے کہ سپریم کورٹ کا فیصلہ سن کر بڑی تکلیف ہوئی اسپیکر نے خفیہ مراسلہ چیف جسٹس کو انکوائری کیلئے بھجوایا، مراسلہ کابینہ، پارلیمنٹ اور نیشنل سیکیورٹی کمیٹی کے سامنے بھی رکھا گیا، اس سے زیادہ کیا کرسکتا تھا؟۔ سپریم کورٹ سے سوال پوچھتا ہوں کہ جب صدر مملکت نے چیف جسٹس کو مراسلہ بھیجا تھا تو کیا آپ کو انکوائری نہیں کرنی چاہیے تھی۔ انہوں نے کہا کہ امریکی انڈر سیکریٹری کی دھمکی 22 کروڑ عوام کی توہین تھی۔ وزیراعظم کو دھمکی دے کر ہٹا دیا گیا اور کچھ نہیں ہوا؟ محترم چیف جسٹس یہ تو پتا کراتے ڈونلڈ لو نے کس کو پیغام دیا؟ کہ عمران کو ہٹاؤ، اگر انکوائری نہیں کرائیں گے تو آئندہ ہمارا کوئی بھی وزیراعظم امریکا کے آگے کھڑا نہیں ہوسکے گا۔