حزب اللہ پر حملہ ہوا تو امریکی مفادات کو نشانہ بنائیں گے، عصائب اہل الحق

بغداد : عراقی مزاحمتی گروپ عصائب اہل الحق کے رہنما قیس الخزعلی نے امریکہ کو سنگین نتائج سے خبردار کیا ہے۔ عراقی ملیشیا کا کہنا ہے کہ اگر تل ابیب نے حزب اللہ پر حملہ کیا تو خطے میں امریکی مفادات بھی محفوظ نہیں رہیں گے۔ اگر امریکہ اسرائیل کی حمایت جاری رکھتا ہے اور لبنان اور حزب اللہ پر حملہ کرتا ہے تو خطے اور عراق میں امریکی مفادات ہمارا جائز ہدف بن جائیں گے۔ انہوں نے مزید کہا کہ ایسی لیکس سامنے آئی ہیں جو اسرائیل کے لبنان اور حزب اللہ پر حملے کے عزائم کی نشاندہی کرتی ہیں۔ اسرائیل بار بار لبنان میں فوجی کارروائی کی دھمکیاں دے رہا ہے۔
اس سے پہلے امریکی فوج کے جوائنٹ چیفس آف اسٹاف کے چیئرمین جنرل چارلس براؤن نے خبردار کیا ہے کہ اسرائیل کا کوئی بھی حملہ خطے میں ایران اور اس کے اتحادی مسلح گروہوں کے درمیان وسیع تر جنگ کے خطرات کو بڑھا سکتا ہے کیونکہ ایران کو حزب اللہ کا اہم ترین اتحادی سمجھا جاتا ہے۔