Raza Musani 
غزہ : حماس نے غزہ میں مختصر مدت کی جنگ بندی کو یکسر مسترد کر دیا ہے۔ حماس کے سینئر رہنما طاہرالنونو نے اے ایف پی کو بتایا کہ حماس ایک سال سے جاری جنگ کو عارضی طور پر روکنے کی کوئی تجویز قبول نہیں کرے گی۔ جنگ میں عارضی توقف کی تجویز کا مقصد دوبارہ جارحیت شروع کرنے کے لیے ہے۔ انہوں نے کہا کہ حماس پہلے ہی واضح کرچکی ہے کہ جنگ بندی عارضی نہیں مستقل ہونی چاہئے۔ انہوں نے کہا کہ غزہ میں جنگ بندی کے ثالثوں سے توقع ہے کہ وہ حماس کو ایک ماہ سے بھی کم کی جنگ بندی کی تجویز دیں گے۔
ادھر اسرائیل کے غزہ میں وحشیانہ حملوں کا سلسلہ جاری ہے۔ جبالیہ۔ نصیرات پناہ گزین کیمپ بیت لاہیہ اور دیگر مقامات پر حملوں میں 45 فلسطینی شہید اور درجنوں زخمی ہوگئے۔ ادھراسرائیلی فوج نے بیت لاہیا میں بھی زمینی دراندازی شروع کر دی ہے۔ جس سے مکینوں کو نقل مکانی پر مجبور کیا گیا ہے اور مبینہ طور پر علاقے کو خالی کرنے کے بعد مکانات کو جلا دیا گیا ہے۔
