حماس ایک نظریہ ہے اسے فوجی آپریشن سے ختم کرنا ممکن نہیں، اسرائیلی فوجی ترجمان

تل ابیب : اسرائیلی فوج کے ترجمان رئیر ایڈمرل ڈینیئل ہیگری نے تسلیم کیا ہے کہ حماس کا مکمل خاتمہ ممکن نہیں ہے۔ حماس ایک نظریے کا نام ہے جس کو فوجی آپریشن سے ختم کرنا ممکن نہیں ہے۔ فوجی ترجمان رئیر ایڈمرل ڈینیئل ہیگری نے مزید کہا کہ حماس کو غزہ سے غائب کرنے کی بات کرنا عوام کو گمراہ کرنے کے مترادف ہے۔ کیونکہ حماس صرف ایک جماعت نہیں ہے۔ بلکہ ایک نظریہ بھی ہے جو لوگوں کے دلوں میں پیوست ہے۔ ہیگری نے خبردار کیا کہ جب تک حکومت کوئی قابل عمل متبادل تلاش نہیں کرتی، حماس غزہ کی پٹی میں موجود رہے گی۔ فوجی ترجمان کے بیان سے فوجی قیادت اور وزیراعظم کے رائے میں فرق بھی واضح ہوگیا ہے۔ کیونکہ نیتن یاہو کے دفتر نے حماس کی فوج اور حکمرانی کی صلاحیتوں کی تباہی کو جنگی ہدف کے طور پر پیش کیا تھا۔