دنیا بھر میں یہودیوں اور مسلمانوں کے خلاف تعصب میں اضافہ

واشنگٹن : امریکی حکومت کی سالانہ رپورٹ میں غزہ کی جنگ کے دوران دنیا بھر میں یہودیوں اور مسلمانوں دونوں کے خلاف بڑھتے ہوئے تعصب کے بارے میں تشویش کا اظہار کیا گیا ہے۔ امریکی وزیر خارجہ انٹونی بلنکن اور بین الاقوامی مذاہب کے خصوصی سفیر رشاد حسین نے بین الاقوامی مذہبی آزادی کی عالمی صورتحال سے متعلق سال دو ہزار تئیس کی رپورٹ جاری کی، جس میں کہا گیا ہےکہ دنیا بھر میں لاکھوں لوگ اب بھی مذہبی آزادی کے احترام سے محروم ہیں۔ بلنکن نے کہا کہ سات اکتوبر کو اسرائیل پر حماس کے حملے اور اس کے نتیجے میں شروع ہونے والے غزہ کے تنازعے کے بعد دنیا بھر میں صیہونی مخالفت اور اسلاموفوبیا دونوں میں نمایاں اضافہ ہوا ہے۔ انہوں نے کہا کہ امریکہ میں بھی نفرت پر مبنی جرائم اور مسلمانوں اور یہودیوں کو نشانہ بنانے والے واقعات پیش آئے ہیں۔ رشاد حسین نے چین کو 2023 میں بنیادی حقوق کی بار بار خلاف ورزی کرنے والوں میں سے ایک قرار دیا۔ انہوں نےکہا کہ چینی حکومت سنکیانگ میں ایغور نسل کے مسلمانوں اور دوسرے نسلی اور مذہبی اقلیتی گروپوں کے ارکان کے خلاف جبر کا ارتکاب کررہی ہے ۔