حکومت تبدیل، پھر بھی 15 لاکھ افغان مہاجر پاکستان چھوڑنے کو تیار نہیں

ویانا : پاکستان ایشیا میں پناہ گزینوں کی میزبانی کرنے والا سب سے بڑا ملک ہے کیونکہ 15 لاکھ افغان شہری اب بھی اس ملک میں رہنے کو ترجیح دیتے ہیں جبکہ امریکی افواج کی کابل سے عجلت میں راتوں رات واپسی کو ایک سال کا عرصہ گزر چکا ہے۔اقوام متحدہ کے ہائی کمشنر برائے مہاجرین (یو این ایچ سی آر) نے جاری کردہ ایک رپورٹ میں کہا ہے کہ ایشیا پیسیفک خطے میں پناہ گزینوں کی تعداد میں گزشتہ سال کے دوران ایک لاکھ 38 ہزار 400 افراد کا اضافہ ہوا جس کے ساتھ اب مہاجرین کی یہ تعداد عالمی مہاجرین کی 42 لاکھ آبادی کا 19 فیصد ہے یہ اضافہ 2020 کے مقابلے میں 3 فیصد زیادہ ہے۔دسمبر 2021 تک ڈاکومینٹیشن اور انفارمیشن ویری فیکشن ایکسرسائز (ڈرائیو) کے مطابق پاکستان میں 12 لاکھ 52 ہزار 800 رجسٹرڈ افغان شہری تھے جن کے پاس رجسٹریشن کا ثبوت (پی او آر) کارڈز تھے۔ رجسٹرڈ خاندانوں کے مزید ایک لاکھ 29 ہزار 700 غیر رجسٹرڈ ارکان تصدیق کے منتظر ہیں۔سرکاری اندازوں کے مطابق اگست 2021 سے اب تک تقریباً 2 لاکھ 50 ہزار افغان شہری پاکستان میں داخل ہوئے ہیں۔