Raza Musani 
غزہ : غزہ کے علاقے زیتون میں تین سال پہلے تباہ ہونیوالے گھروں کے ملبے سے ایک سو چھ انسانی باقیات برآمد کرلی گئیں۔ جس میں پچپن لاشیں درست حالت میں ہیں۔فلسطینی ذرائع کے مطابق امدادی ٹیموں نے مالکا، ارحیم، سلمی اور بلاوی خاندانوں کی تباہ شدہ رہائش گاہوں کے ملبے کو ہٹانے کا کام مکمل کرلیا۔ یہ عمارت نومبر 2023 میں اسرائیلی حملے میں تباہ ہوئی تھیں۔
سول ڈیفنس ٹیموں نے مالکا خاندان کے گھر کے ملبے سے پچپن فلسطینیوں کی لاشیں برآمد کی ہیں۔ مالکا خاندان کے افراد بے گھر ہونے کے بعد اس عمارت میں پناہ لیے ہوئے تھے، جہاں اسرائیلی حملہ کیا گیا۔ غزہ کی وزارت صحت، اقوام متحدہ کے اداروں اور امدادی تنظیموں کے اندازے کے مطابق دس ہزار سے چودہ ہزار افراد اب بھی ملبے تلے لاپتہ ہیں۔
سول ڈیفنس ٹیموں کو غزہ میں ملبے تلے دبے افراد کی باقیات نکالنے کے لیے شدید مشکلات اور محدود وسائل کا سامنا ہے۔ انہوں نے عالمی انسانی امدادی تنظیموں سے مطالبہ کیا ہے کہ ملبے سے زیادہ سے زیادہ افراد کی باقیات نکالنے کے لیے ضروری بھاری مشینری اور دیگر آلات فراہم کیے جائیں۔
