مغربی کنارے میں یہودی اسرائیلی ریاست قائم کرنے کا اعلان

تل ابیب : صیہونی وزیر دفاع اسرائیل کاٹز نے تمام عالمی قوانین کو ہوا میں اڑاتے ہوئے مقبوضہ مغربی کنارے میں یہودی ریاست قائم کرنے کا اعلان کردیا۔ اسرائیل کاٹز نے مغربی کنارے کی سا-نور بستی کے دورے کے موقع پر فرانسیسی صدر ایمانوئل میکرون پر سخت تنقید کی جنہوں نے کہا تھا کہ فلسطینی ریاست کو شرائط کے ساتھ تسلیم کرنا اخلاقی فرض ہے۔انہوں نے بائیس نئی یہودی بستیوں کی تعمیر کے اعلان کو آبادکاروں کی تحریک کے لیے تاریخی لمحہ قرار دیا اور کہا کہ یہ میکرون اور ان کے دوستوں کے لیے ایک واضح پیغام ہے۔ اسرائیلی وزیردفاع کاٹز نےکہا کہ یہ اعلان دہشت گرد تنظیموں کے لیے فیصلہ کن جواب ہے۔ جو اس سرزمین پر ہماری گرفت کمزور کرنے اور اس کو نقصان پہنچانے کی کوشش کر رہے ہیں۔ انہوں نے کہا کہ فرانسیسی صدر فلسطینی ریاست کو کاغذ پر تسلیم کریں گے اور ہم زمین پر یہودی ریاست قائم کریں گے ۔ کاغذ تاریخ کے کوڑے دان میں پھینک دیا جائے گا اور اسرائیلی ریاست خوشحال ہوگی۔