ڈیڈلائن قریب، غزہ میں امداد کی صورتحال بہتر نہ ہوئی، امریکی ڈرامہ

واشنگٹن : اسرائیل میں اسلحہ کا ڈھیر لگانے والے امریکا نے دنیا کو دکھانے کیلئے غزہ میں صورتحال بہتر بنانے کے اسرائیلی اقدامات کو ناکافی قرار دیا ہے۔امریکی محکمہ خارجہ کے ترجمان میتھیو ملر نے کہا ہے کہ اسرائیل نے غزہ تک امداد کی رسائی بڑھانے کے لیے کچھ اقدامات کیے ہیں لیکن ڈیڈ لائن قریب آنے کے باوجود اب تک وہاں انسانی امداد کی صورتحال تبدیل کرنے میں ناکام رہا ہے۔ خبر رساں ادارے روئٹرز کے مطابق امریکا نے غزہ میں امداد کی رسائی کے لیے اسرائیل کو 30 دن کی مہلت دی تھی تاہم دو ہفتے گزرنے کے بعد بھی تل ابیب کی جانب سے خاطر خواہ اقدامات سامنے نہیں آئے۔ میتھیو ملر نے کہا کہ خط میں دی گئی سفارشات کو دیکھیں تو وہ پوری نہیں ہو سکی ہیں۔ اب تک کے نتائج زیادہ اچھے نہیں تاہم اس بات پر زور دیا کہ 30 دن کی مہلت ابھی نہیں گزری ہے۔ انہوں نے یہ بتانے سے گریز کیا کہ اگر اسرائیل نے سفارشات پر عمل درآمد نہیں کیا تو اسے کس قسم کے نتائج کا سامنا کرنا پڑے گا۔