Raza Musani 
روس اور شمالی کوریا نے جامع اسٹریٹیجک پارٹنرشپ کا معاہدہ کر لیا ہے۔ معاہدے کے تحت کسی ایک ملک پر بیرونی جارحیت کی صورت میں دونوں ممالک باہمی تعاون کریں گے جس میں فوجی تکنیکی تعاون بھی شامل ہو گا۔ شمالی کوریا کے رہنما کم جونگ اُن نے یوکرین جنگ میں روس کی مکمل حمایت کا اظہار کیا ہے۔ غیر ملکی میڈیا کے مطابق روس کے صدر ولادیمیر پیوٹن نے یوکرین جنگ پر شمالی کوریا کی حمایت کو سراہا اور کہا ہے کہ ماسکو امریکا اور اس کے اتحادیوں کی سامراجی پالیسی کا مقابلہ کر رہا ہے۔ دوسری جانب کم جونگ اُن نے کہا ہے کہ شمالی کوریا اور روس کے تعلقات خوشحالی کے دور میں داخل ہو رہے ہیں۔ غیر ملکی میڈیا کے مطابق امریکی پینٹاگون نے روس اور شمالی کوریا کے درمیان تعاون پر تشویش کا اظہار کیا ہے۔ علاوہ ازیں نیٹو سربراہ کا کہنا ہے کہ خدشہ ہے کہ روس شمالی کوریا کے میزائل اور جوہری پروگرام کے لیے مدد کر سکتا ہے۔ روس کے صدر اب سرکاری دورے پر ویتنام پہنچ گئے ہیں۔ روس اور ویتنام کے درمیان بھی جامع اسٹریٹیجک معاہدہ کی جانب پیشرفت کا امکان ہے۔
