غزہ میں قحط اور نسل کشی روکنے کیلئے عالمی مداخلت کا مطالبہ

جدہ : سعودی کابینہ نے غزہ میں قحط اور نسل کشی کے خاتمے کیلئے عالمی برادری سے فوری مداخلت کا مطالبہ کردیا۔ جدہ میں شاہ سلمان بن عبدالعزیز کی زیر صدارت کابینہ کے اجلاس میں خطے اور دنیا کی تازہ صورت حال کا جائزہ لیا گیا۔ کابینہ نے غزہ کی سنگین صورتحال پر عالمی برادری سے ہنگامی اقدامات کی اپیل کی اور او آئی سی وزرائے خارجہ اجلاس کے فیصلوں کی مکمل حمایت کا اعادہ کیا گیا۔ کابینہ نے کہاکہ اسرائیلی خلاف ورزیاں بغیر حساب و سزا کے جاری رہیں تو یہ عالمی نظام، بین الاقوامی قانون اور علاقائی و عالمی امن و استحکام کے لیے خطرہ ہے۔ کابینہ نے اسرائیل کی جانب سے شامی سرزمین پر مسلسل خلاف ورزیوں، دراندازی اور شام کے داخلی امور میں مداخلت کی سخت مذمت کی۔