Raza Musani 
غزہ :غزہ میں صیہونی فوج نے آج بھی وحشیانہ حملے جاری رکھے۔ بمباری اور گولہ باری سے چونتیس فلسطینی شہید اور کئی زخمی ہوگئے۔ صیہونی فوج نے محفوظ علاقہ قرار دئے گئے المواصی کے ایک کیفے پر اس وقت بم برسادئے جب وہاں لوگ فٹبال میچ دیکھ رہے تھے۔ وحشیانہ حملے میں چودہ فلسطینی شہید اور کئی زخمی ہوگئے۔ اسرائیلی ٹینکوں نے النصیرات میں شدید گولہ باری کی جس سے نو فلسطینی جان سے گئے۔ جبکہ غزہ سٹی میں دو مختلف حملوں میں گیارہ فلسطینی جان سے گئے۔ جنگی طیاروں نے بیت حنون اور دوسرے علاقوں پر بھی بم برسائے۔ دیر البلاح پر حملے میں چھ فلسطینی شہید ہوئے۔
ادھر صیہونی فوج کو القسام بریگیڈ کی جانب سے شدید مزاحمت کا سامنا ہے۔ شمالی غزہ میں القسام بریگیڈ کے حملے میں میجر سمیت چار اسرائیلی فوجی ہلاک اور گیارہ زخمی ہوئے ۔۔ادھر اسرائیل کو امریکا کی جانب سے غزہ میں خوراک کی فراہمی بہتر بنانے کیلئے دی گئی مہلت ختم ہونے میں ایک دن رہ گیا لیکن تاحال صورتحال میں کوئی تبدیلی نہیں آئی۔۔ اقوام متحدہ سمیت تمام عالمی ادارے غزہ میں قحط پھیلنے کا خدشہ ظاہر کررہے ہیں۔
