Raza Musani 
لندن : معروف اسکالر ولیم شابیس نے برطانوی وزیر اعظم کیئر اسٹارمر اور سیکرٹری خارجہ ڈیوڈ لیمی کی غزہ میں نسل کشی سے انکار پر انہیں منافق قرار دے دیا۔ نسل کشی پر بیس سے زائد کتابوں کے مصنف ولیم شابیس نے کیئر اسٹارمر اور ڈیوڈ لیمی کیطرف اشارہ کرتے ہوئے کہاکہ یہ لوگ منافق ہیں۔ یہ نسل کشی کنونشن کی تشریح یا اطلاق یکساں طریقے سے نہیں کرتے۔ انہوں نے کہا کہ برطانوی ارکان پارلیمنٹ کے بیانات میں استعمال کی گئی زبان کا انحصار اس بات پر ہوتا ہے کہ وہ اپنے دشمنوں کے بارے میں بات کررہے ہیں یا دوستوں کے۔ نامور ماہر قانون نے کہا کہ لیمی اور اسٹارمر نے 2021 میں ہاؤس آف کامنز کی تحریک کے حق میں ووٹ دیا جس میں چین کی ایغور اقلیت کی نسل کشی کی مذمت کی گئی تھی۔ انہوں نے کہا کہ چین میں ایغوروں پر ظلم وستم کے شواہد موجود ہیں مگر لاکھوں کے قتل کے نہیں۔ انہوں نے کہا کہ ایغوروں اور فلسطینیوں کے ساتھ سلوک کا موازنہ نہیں کیا جا سکتا۔
ولیم شابیس نے 2014 میں بین الاقوامی عدالت انصاف میں سربیا کے خلاف نسل کشی کے مقدمے میں کروشیا کی نمائندگی کرنے والے وکیل کے طور پر اسٹارمر کے کردار سمیت ان کے اور فارن سیکریٹری کے دوہرے معیار کی متعدد مثالیں پیش کیں۔
