Raza Musani 
دہلی : ایرانی صدر مسعود پزشکیان نے برکس ممالک پر زور دیا ہے کہ مضبوط تجارتی نیٹ ورک قائم اور قومی کرنسیوں میں تجارت کو فروغ دیا جائے۔ انہوں نے کہا کہ اقتصادی سلامتی کو قومی اور علاقائی سلامتی سے الگ نہیں کیا جا سکتا۔ مسعود پزشکیان نے نئی دہلی میں برکس بزنس فورم سے خطاب کرتے ہوئے کہا کہ جغرافیائی سیاسی غیر یقینی، سپلائی چین میں رکاوٹوں اور اقتصادی دباؤ کے باعث عالمی معیشت کو نئے چیلنجز درپیش ہیں۔
ایرانی صدر نے برکس ممالک کے درمیان تجارت، سرمایہ کاری اور مالی تعاون کا مربوط نیٹ ورک قائم کرنے پر زوردیا۔ انہوں نے قومی کرنسیوں کے استعمال میں اضافے کو مالیاتی نظام کو سیاسی جھٹکوں سے محفوظ رکھنے کے لیے اہم قرار دیا۔ پزشکیان نے کہا کہ تجارت، توانائی، بنیادی ڈھانچے یا مالیاتی نظام پر دباؤ کے اثرات سرحدوں سے باہر بھی پھیل سکتے ہیں۔
انہوں نے خوراک اور توانائی کے تحفظ کو اقتصادی سلامتی کے دو بنیادی ستون قرار دیا اور برکس کی سپلائی چین میں ایران کے کردار کی پیشکش کی۔ ایرانی صدر نے مصنوعی ذہانت اور سائبر سکیورٹی کے شعبوں میں بھی برکس ممالک کے درمیان تعاون بڑھانے پر زور دیا۔
