ایرانی حملوں کی حمایت، بحرین میں ایک شخص کو 5 سال قید کی سزا

مناما : بحرین کی فوجداری عدالت نے ایرانی حملوں کی حمایت اور تائید کرنے پر ایک شخص کو پانچ سال قید کی سزا سنا دی۔ ملزم نے سوشل میڈیا پر ایسی تصاویر، ویڈیوز اور تبصرے پوسٹ کیے تھے جنہیں ایرانی حملوں کی حمایت قرار دیا گیا جس کے بعد سائبر کرائم یونٹ کی رپورٹ پر تحقیقات شروع کی گئیں۔ عدالت نے 5 سال قید کے ساتھ ساتھ ملزم کو 2 ہزار بحرینی دینار جرمانے اور کچھ آلات کو ضبط کرنے کا حکم بھی جاری کردیا۔ حکام نے گواہوں کے بیانات بھی قلمبند کیے جبکہ ضبط کیے گئے الیکٹرانک آلات کا تکنیکی ماہرین سے معائنہ کرایا گیا۔