امریکی شہریوں کے کینیڈا منتقلی کے رجحان میں اضافہ

کورونا سے شرح اموات اور متاثرین میں اضافہ سے امریکی تشویش میں مبتلا
واشنگٹن(نیوز ڈیسک) امریکی صدر ڈونلڈ ٹرمپ کی پالیسیوں کی وجہ سے امریکا سے کینیڈا نقل مکانی کرنیوالوں کی تعداد میں مسلسل اضافہ ہورہا ہے، گلوبل نیوز نے مختلف امیگریشن وکلا کے حوالے سے اپنی رپورٹ میں بتایا کہ امریکی شہری کورونا وائرس سے شرح اموات اورمتاثرین کی تعداد میں اضافے سے سخت تشویش میں مبتلا ہیں اور وہ کینیڈا کو اپنے لئے ایک محفوظ ٹھکانا سمجھ رہے ہیں ،رپورٹ کے مطابق جن امریکی شہریوں کے کینیڈا میں شریک حیات، منگیتر یا شراکت دار موجود ہیں یاپھر وہ والدین کے ذریعے کینیڈا کی شہریت کی درخواست دے رہے ہیں ، کینیڈا بارڈر سروس کے اعدادوشمار کے مطابق 6 اپریل سے 12 اپریل کے درمیان ایک لاکھ 7ہزار795 امریکی شہریوں نے سرحد عبور کی جبکہ جولائی میں اسی مدت کے دوران ایک لاکھ 72 ہزار 842 امریکی شہری کینیڈا میں داخل ہوئے یہ تین ماہ میں 60 فیصد اضافہ ہے جبکہ گذشتہ سال اسی مدت میں 90 فیصد کمی ہوئی تھی