امریکا سے سعودی عرب کے زیر تربیت فوجی بیدخل

امریکا نے انتہاپسندی اور پورنو گرافی میں ملوث ایک درجن سے زائد سعودی کیڈٹس بیدخل کردئے، فیصلہ ایف بی آئی کی رپورٹ کی روشنی میں کیا گیا
ریاض نے امریکی فوجیوں کی تعیناتی پرایک ارب ڈالر ادا کردئے، مزید فوجی درکار ہیں تو مزید رقم دینا ہوگی، سعودیہ کے پاس پیسے کے سوا کچھ نہیں، ٹرمپ
واشنگٹن(نیوز ڈیسک) امریکا نے سعودی عرب کے ایک درجن سے زائد زیرتربیت فوجیوں کو بیدخل کردیا جبکہ امریکی صدرڈونلڈ ٹرمپ نے فوجیوں کی تعیناتی کیلئے سعودی عرب سے مزید رقم مانگ لی، امریکا نے تحقیقاتی ادارے ایف بی آئی کی تفتیشی رپورٹ کی روشنی میں سعودی عرب سے تعلق رکھنے والے ایک درجن سے زائد زیرِ تربیت فوجیوں کو بے دخل کرنے کا فیصلہ کیا، امریکی اخبار واشنگٹن پوسٹ کے مطابق ایف بی آئی نے ان زیر تربیت سعودی فوجی افسران کا تعلق انتہا پسندی کے خیالات، چائلڈ پورنو گرافی اور اپنے ایک ساتھی کے ذہنی رجحان سے حکام کو آگاہ نہ کرنے کے واقعات سے جوڑا ہے، 6 دسمبر کو ایک زیرِ تربیت سعودی فوجی نے فلوریڈا میں امریکی بحریہ کے ہوائی اڈے پر فائرنگ کرکے 3 اہل کاروں کو ہلاک کر دیا تھا، جس کے بعد یہ فیصلہ کیا گیا،ادھر فاکس نیوزسے انٹرویومیں صدر ڈونلڈ ٹرمپ نے انتہائی تحقیر آمیز لہجہ اختیار کرتے ہوئے سعودی عرب کی جانب اشارہ کیا اور کہا کہ پیسے کے سوا ان کے پاس کچھ بھی نہیں ہے، سعودی عرب امریکی حمایت کے اخراجات ادا کر رہا ہے،سعودی عرب نے ایران کے حملوں سے محفوظ رہنے کیلئے مزید فوج بھیجنے کا مطالبہ کیا تھا، لیکن ریاض کو کہا گیا کہ اسے فوج کی تعیناتی کے اخراجات دینا ہوں گے،ڈونلڈ ٹرمپ نے کہا کہ سعودی عرب نے پہلے ایک ارب ڈالر کا معاوضہ امریکی اکاؤنٹ میں جمع کرایا اور اس کے بعد فوج کو ریاض بھیجا گیا۔